O NOSO ALUMNADO ASISTE AO MUSICAL "WICKED"

Onte o noso alumnado de 3º e 4º da ESO asistiu ao musical "WICKED" que se representou no IES "Manuel Buján" de Cambre.

NA DESPEDIDA Á NOSA AUXILIAR DE CONVERSA, SARAH WADE

 Hoxe é o último día lectivo da nosa auxiliar de conversa SARAH WADE. A lectora americana que nos acompañou este curso 2022-23.

Dende aquí, so queremos agradecerlle o seu traballo, e a súa amabilidade e disposición. Esperamos que sexa un "ata pronto" porque hai posibilidades de que volva o curso que ven.

- OS ANTERIORES AUXILIARES NO RECORDO.

NOVA CAMPAÑA POLA LINGUA: A RAPAZADA DO IES "RAFAEL DIESTE" PREPARA A BANDA SONORA DO CURSO 2022/23

 

“A prensa fala nestes días que as Tanxugueiras disputan o escenario mundial con Beyoncé, Bad Bunny ou Rosalía, pero... e que outras cousas hai para nos ofrecer?”

 

A esta pregunta dálle resposta a mocidade coruñesa que estuda no IES Rafael Dieste, e por iso lanzan agora unha nova campaña de promoción da lingua entre a xuventude que pon o foco na música galega contemporánea.

 

Do rap ao indie ou do trap ao rock, pasando polos ritmos da bachata, o reggaeton ou a música disco. Porque hai un universo sonoro por descubrir na nosa lingua.

 

Un ramallete florido de solistas e agrupacións que, moitas veces sen a promoción dos medios, se abren ao mundo construíndo cultura e engordando o patrimonio galego con cada creación.

 

Após un traballo intenso de pescuda por este universo musical, o alumnado do primeiro ciclo da ESO, e baixo a coordinación do profesor Alberto Pombo, propúxose crear 40 recomendacións individualizadas que se divulgarán en formato póster.

 

Deste xeito, cada un dos alumnos que participa no proxecto escolle unha banda e manifesta as razóns da súa recomendación ou explica que sinte cada vez que os escoita. Aínda, cada póster inclúe un código QR que liga para o traballo audiovisual preferido en cada banda.

 

Por outra banda, tamén se presenta unha playlist (sptfy.com/NHAW) con máis de 100 temas de 100 grupos diferentes. Cancións escollidas polo alumnado para que a cultura sexa transmitida entre iguais e baixo os seus propios gostos: Sondarúa, C Mirazo, Boyanka Kostova, Zavala, Os amigos dos músicos, Hydn, Dj Rokiño, Secho y los invisibles, The Rapants, Quartzo e un, por fortuna, longuísimo etcétera.

 

Ademais, este traballo contará coa colaboración e a promoción externa da plataforma Galeguiza_t (páxina referencial na difusión da música en galego e premio Mil Primaveras ao mellor proxecto de promoción da lingua entre a mocidade) que  divulgará o traballo do alumnado desde a súa páxina na rede social instagram (@galeguiza_t).

 

A música galega xa ten predicamento entre a mocidade coruñesa que estuda no Dieste. Mocidade que, con esta nova iniciativa normalizadora, pretende sumar máis unha forza para espallar cultura e lingua, agora en forma de canción, por fóra dos muros do instituto.

 

3... 2... 1... Dentro música!

- TODA A INFO "BANDA SONORA DO CURSO 22/23" en PDF.