Intercambio entre Altkönigschule e o IES Rafael Dieste. Visita do alumnado alemán

A semana pasada levouse a cabo a segunda parte do intercambio IES Pluriligüe Rafael Dieste co Altkönigschule de Kronberg (Frankfurt). Foron 8 días intensos de clases e actividades, asombros e risas. O alumnado alemán e as súas profesoras apreciaron moito nosas praias, paisaxes e a comida, pero sosbre todo a boa e cálida acollida das nosas familias, ás que agradecemos a súa implicación neste proxecto.

VIII Xornadas de Formación en Mediación Escolar

Hoxe, mércores 2 de abril, tivo lugar a primera sesión das VIII Xornadas de Formación en Mediación Escolar, pensadas especialmente para o alumnado que queira formar parte do equipo de mediación.

Vémonos o 9 de abril, pola tarde no instituto, para a segunda sesión!

Visita ao Museo de Belas Artes da Coruña

Durante a mañá do martes 1 de abril, as alumnas de Historia da arte de 2º de bacharelato visitaron o Museo de Belas Artes da Coruña e o seu obradoiro de restauración.

Charla sobre o perigo das fake news

O pasado 20 de marzo o alumnado de 1º de bacharelato asistiu a unha charla sobre o perigo das mentiras, bulos e desinformación en redes sociais, impartida por César Rodríguez, antigo alumno do centro e periodista da Voz de Galicia.

Información sobre bolsas de estudo MEC 2025/2026

Aberto ata as 15:00 horas do 14 de maio de 2025 o prazo de presentación de solicitudes para bolsas de estudo MEC 2025/2026.

Para que estudos pode solicitar unha bolsa?

Para alumnado que no curso 2025/2026 estea matriculado en:

• Bacharelato
• Cursos de acceso e de preparación para probas de acceso á Formación Profesional e cursos de formación específicos para acceso a ciclos formativos de grao medio e superior, impartidos en centros públicos e privados concertados
• Formación Profesional de grao medio e de grao superior
• Ensinos artísticos: profesionais e superiores
• Ensinos de idiomas en Escolas Oficiais, incluída a modalidade a distancia
• Ensinos deportivos
• Estudos relixiosos superiores
• Formación Profesional de Grao Básico
• Ensino universitario: Graos, Mestrados...

Como solicitala?

1. Accede á sede electrónica https://sede.educacion.gob.es

Todo o proceso de solicitude da bolsa realízase a través da sede electrónica do Ministerio de Educación, Formación Profesional e Deportes.

2. Rexístrate

• Para rexistrarte, necesitas un usuario e un contrasinal:
• Se xa te rexistraches previamente para calquera outro trámite, a túa conta segue sendo válida e non fai falta que che volvas a rexistrar.
• Se nunca te rexistraches, clica en «Rexístrese» e segue os pasos para crear unha conta.
• Para acceder á solicitude de bolsa, podes facelo de dúas formas:
• Con Cl@ve (claves electrónicas de administracións públicas) ou certificado electrónico, se dispós deles, ou
• Mediante o mesmo usuario e contrasinal cos que te rexistraches na sede electrónica.

3. Enche o formulario

Unha vez dentro, tes que encher o formulario en liña.

4. Imprime o xustificante de presentación. Comproba se te atopas nalgunha das situacións para remitir documentación.

Enderezo para remitir documentación á unidade de bolsas:

Departamento Territorial da Coruña. Consellería de Educación, Ciencia, Universidades e Formación Profesional

Servizo de Apoio aos Servizos Educativos

Sección de Bolsas de Estudo

R/ Vicente Ferrer, nº 2, 9º andar

15008 A Coruña

Para máis información: https://www.becaseducacion.gob.es/

Durante os meses de agosto e setembro debes estar atento a notificacións a través do correo eletrónico ou da sede electrónica.

Non o deixes para o final. Pide a túa bolsa aínda que non saibas o que vas estudar ou mesmo se vas ou non a estudar.

Para calquera dúbida, podes consultar a través de:

Teléfonos: 981 184 741, 981 184 742, 981 182 436, 981 185 725, 981 184 769

Correo electrónico: bolsas.ed.co@xunta.gal

 

Alumnado do IES Plurilingüe Rafael Dieste premiado no concurso literario "Rita Suárez Amado"

Por quinto ano consecutivo, alumnado do IES Plurilingüe Rafael Dieste foi galardoado no Concurso Literario "Rita Suárez Amado" que organiza o IES Plurilingüe Eusebio da Guarda, e que celebra este ano as 20 edicións.

Julieta Pérez Luna, de 3º ESO, foi premiada na súa categoría, e Sofía Carou Barreiro, de 4º ESO, e Daniel Rey Cousillas, de 1º bacharelato, acadaron accésits.

Coma sempre, agradecementos especiais á mestra xubilada Mercedes Garrote, que animou ao alumnado a participar no certame, axudándoos no proceso.

Parabéns!

Nova reunión do club Negrísima, de novela negra

Nova reunión de Negrísima, o club de novela negra do IES Rafael Dieste.  Este mes lemos a novela de Mankell, A quinta muller.

La quinta mujer de Henning Mankell é unha novela de misterio que segue ao inspector Kurt Wallander. A historia comeza cunha serie de crimes brutais que parecen estar conectados entre si, todos eles relacionados coas vidas de cinco mulleres.

A medida que Wallander investiga, descobre que cada unha delas ten un pasado complicado e que as súas historias están entrelazadas. A trama explora temas como a violencia de xénero e a busca de xustiza.

A tensión aumenta a medida que Wallander se adentra na mente do criminal, e a súa propia vida tamén se ve afectada.

A novela combina elementos de thriller e reflexión social, mantendo ao lector enganchado ata o final.

Exposición Menssana na Domus

O alumnado de 1º de Bacharelato de Cultura Científica asistiu o venres 7 de marzo á inauguración na Domus da exposición Menssana.

menteScopia é unha iniciativa multimedia de divulgación e promoción da Saúde Mental. Trátase dunha aposta pola educación, a concienciación e a sensibilización en Saúde Mental dirixida aos mozos e que conciencie a pacientes, familias, profesorado, asociacións e outros sectores sociais. MenteScopia persegue transmitir que normalizar a comunicación sobre problemas de Saúde Mental e coñecer o funcionamento do cerebro mellora a saúde mental da poboación e o benestar social.

Dobre premio para Román Rojo: Filosofía e Poesía

Celebramos este mes os dous galardóns que recibiu o noso alumno Román Rojo Campaña, de 1º de Bacharelato: gañador da Olimpíada Filosófica en disertación e o primeiro accésit do Minerva de poesía.

Parabéns Román!

Medicións de radon por parte de alumnado de 1º de bacharelato

A semana pasada, alumnado de 1º Bacharelato da materia de Física e Química, estivo realizando medicións de radon polo centro co dispositivo Minipix cedido polo IGFAE (Instituto Galego de Física de Altas Enerxías da Universidade de Santiago de Compostela).

Esta proposta educativa ten como finalidade o acercamento á física de partículas, a súa medición e o tratamento de datos.

Novidades lectoras

Estes días temos un montón de novidades lectoras na biblioteca do Dieste. Moita banda deseñada, moita novela ilustrada e moitas autoras que poden interesarvos:

Desde Emma de Jane Austen a A rateira de Agatha Christie, escritora inglesa das máis lidas do mundo e coñecida como a gran dama do misterio. Miss Marple e Hercules Poirot son dous dos grandes protagonistas das súas novelas policíacas.

O triángulo vermello é outra das novidades literarias deste mes. Trátase dunha biografía emocional de Mercedes Núñez, loitadora polas liberdades e supervivente do fascismo, a través da mirada inocente do seu fillo Pablo.

Ardentía 1854 conta unha viaxe no tempo que traslada a unha adolescente, Dolores, á Coruña do século XIX e aos tempos do cólera na cidade.

Anímaste a ler? Pasa pola biblioteca do IES Rafael Dieste para botar un ollo a estas novidades e máis ou entra en bibliodieste.com

8M Día Internacional da Muller

Hoxe, no 8M, almorzamos coas rapazas do IES Rafael Dieste na portada do xornal La Opinión A Coruña.

Son Mencía, Susana, Aroa, Sofía, Karina e Evelyn, a reflexionar sobre os retos aos que se enfrontan como mulleres.

Agradecementos tamén para a periodista Gemma Malvido pola reportaxe e ao fotógrafo Iago López polas imaxes.

Visita a Santiago. Pórtico da Gloria e cubertas da Catedral

A semana pasada, o alumnado de Historia da Arte de 2º de bacharelato e o alumnado voluntario da biblioteca do IES Plurilingüe Rafael Dieste visitou o Pórtico da Gloria e as cubertas da Catedral de Santiago de Compostela.

Olimpíada Matemática de 2º ESO. Fase de centro

A semana pasada, 27 alumnas e alumnos do IES Plurilingüe Rafael Dieste participaron na fase de centro da Olimpíada Matemática de 2º ESO.

O alumnado que se clasifique, participará na fase de zona, o próximo 24 de abril, Facultade Ciencias da Educación, xunto con alumnado doutros centros da Coruña.

Proceso de admisión curso 2025/2026

Todo o alumnado de centros educativos adscritos que presentou a solicitude de reserva de praza está admitido. Están publicadas as listaxes no taboleiro do centro.

O prazo de solicitude de praza para o curso 2025/2026 estará comprendido entre o 1 e o 20 de marzo, ambos incluídos.

As prazas vacantes no IES Plurilingüe Rafael Dieste para o curso 2025/2026 son as que aparecen na seguinte imaxe.

Na seguinte ligazón ten información detallada sobre como participar no procedemento de admisión.

• Admisión alumnado

Terceira edición do intercambio entre Altkönigschule e o IES Rafael Dieste

Do 18 ao 25 de febreiro alumnado de 4° ESO visita Kronberg, en Alemaña, coas profesoras Isabel Viña e Leticia Ogando, como parte do intercambio entre Altkönigschule e o IES Rafael Dieste. A finais de marzo recibiremos a visita de alumnado alemán, xunto coas profesoras, Julia Westenburger e Lara Anselm.